【Emily】林定國《愛是這樣甜》贈老婆 音樂節目分享長久婚姻秘訣

【明報專訊】律政司長林定國日前接受港台《音樂中年》訪問，被要求選取5首別具意義嘅歌曲，以分享人生不同階段，林定國首輪就揀歌手譚詠麟嘅《愛是這樣甜》，話送畀同為律師嘅老婆。佢引述歌詞話，長久感情源於平日平實細節及持續溝通，而唔係刻意營造嘅浪漫。

話接新娘時唱呢首歌冧掂外父外母

林定國話，結婚接新娘時佢唱咗《愛是這樣甜》畀太太，說服外父外母「接咗我杯茶」，佢話歌唔止係當時真心願望，仲代表對婚姻生活嘅理解。佢話長久婚姻嘅秘訣正如呢首歌詞「一起吃早餐、早晨幫你揀呔」，在於平凡日常嘅細節，感情毋須花巧亦非刻意營造嘅浪漫。

佢並分享於國外進修時每日寫情信畀太太嘅故事，雖然信中多分享生活瑣事，但目的係保持步伐一致、互相了解，強調持續溝通係維繫感情嘅關鍵，較華而不實嘅舉動更重要。佢話做咗律政司長後陪伴太太嘅時間確實減少，但佢仍會爭取時間與太太傾偈，分享工作以外嘅生活點滴，認為「閒話家常」係維持關係必要一環。