【Emily】超強颱風吹來稀客「赤翡翠」

【明報專訊】熱帶氣旋襲港，除咗帶來風雨，亦可能迎來稀客。嘉道理農場暨植物園噚日喺社交平台話，早前超強颱風樺加沙來襲後，本港出現一批稀有訪客，包括紫背葦鳽、紅頸反蹼鷸、白喉斑秧雞，而最引人注目嘅係香港有紀錄以來第四隻赤翡翠。

呢隻赤翡翠被市民發現時，位於南區嘅金夫人馳馬徑，半身浸喺水池無法飛行。嗰位熱心市民立即聯絡園方，並親自將佢送到園方嘅野生動物拯救中心。中心人員初步檢查發現，佢左翼異常下垂，懷疑喺颱風中受撞擊，幸好X光檢查確定無骨折。經過復育團隊幾日嘅細心照料，赤翡翠逐漸康復，最終野放繼續佢嘅遷徙旅程。

園方提到，赤翡翠嘅出現，唔單止係一次罕見嘅紀錄，更提醒我哋喺極端天氣下，野生動物同樣需要人類嘅關懷同援助。赤翡翠主要分佈範圍為東亞及東南亞，香港至今有4次紀錄，係罕見嘅過境候鳥，佢哋主要喺森林溪流棲息，遷徙期間偶爾會出現喺城市公園。資料顯示，全球114種翠鳥中，香港至少記錄過8種，當中4種係較常見嘅留鳥同冬候鳥，其他為「稀有偶見鳥」和「迷鳥」，赤翡翠就係其中一種。