【Emily】老夫子再做郵票主角

【明報專訊】香港郵政公布明年上半年將發行嘅6套特別郵票，其中有再以港產漫畫老夫子為主題嘅「老夫子II」，將喺4月發行。其他特別郵票仲有「兒童郵票——成語動物園」同「非物質文化遺產——大澳端午龍舟遊涌」等主題。

自2019年發行「老夫子」特別郵票後，香港郵政再度以「老夫子II」為題推出新一套特別郵票，今次會以6個節慶為主題，包括農曆新年、情人節、復活節、端午節、中秋節同聖誕節。

同時，繼2006年、2012年同舊年發行嘅「中國成語故事」郵票，來年會發行「兒童郵票——成語動物園」一套4枚郵票，以插圖呈現有動物元素嘅成語，例如「鶴立雞群」同「如虎添翼」等。香港郵政話希望提升兒童對中國語文嘅認識同興趣，啟發佢哋正向思維。

一年一度嘅生肖郵票就會1月推出，出年係馬年，整套節票包括4枚郵票同兩張郵票小型張，展示唔同姿態嘅馬，配合喜慶嘅顏色。中國郵政、香港郵政同澳門郵電亦會共同發行馬年聯合紀念套摺，有齊三地郵政嘅生肖郵票小全張，銷售安排稍後公布。