【Emily】進博會香港展商按年增三成

【明報專訊】特首李家超正喺上海出席第八屆進博會暨虹橋國際經濟論壇開幕式，仲陪同國務院總理李強參觀中國館香港展區。李家超話，今年進博會超過380間香港企業參展，係歷年之冠，比舊年增加近三成，第一次參展嘅公司就有四成增長。

李家超亦同多個參展商交流，佢轉述有參展企業話，參展對佢哋提高曝光率好有幫助，其中食品館仲新設直播間，畀參展商嘗試直播帶貨推廣產品；服務業展館就舉辦多場分享會，向在場者分享香港嘅創新科技、醫療科技、專業服務、物流等服務。《施政報告》提出組成平台協助內地企業「出海」，李家超話今日喺進博會將舉行詳細論壇，向內地企業介紹。

李家超提到，向總理李強匯報咗香港喺不同領域嘅國際排名，例如全球最自由經濟體、競爭力排名第三、5間大學躋身世界百強等，顯示出喺國家支持下，特區治理水平不斷提高、發展動能不斷加強、民生條件亦不斷改善。