【Emily】公務員學院拍片 「嘢飲同事揀，投票自己揀」

【明報專訊】立法會選舉提名期聽日結束，再有政府部門「出招」呼籲選民12月7號投票。公務員事務局長楊何蓓茵喺facebook上載公務員學院片段，片中職員喺販賣機前猶豫不決，最終要身邊嘅同事幫手揀飲乜。鏡頭一轉轉到立法會選舉海報，職員就話，雖然飲品由同事揀咗，但每個人投票「都有得自己揀」。

局方同日上載另一條片，提到法定語文事務部嘅職員以紙筆墨硯，用書法寫上「公務員齊投票」，並張貼喺辦公室提醒同事投票，形容係「我手寫我心」。楊何蓓茵都即席揮毫。

政府叫東華保良仁濟鼓勵服務使用者投票

民青局噚日就舉行座談會，邀請東華三院、保良局及仁濟醫院等6個本地慈善團體主席同管理層，由署理特首陳國基、勞福局長孫玉菡及民青局長麥美娟呼籲佢哋鼓勵轄下嘅服務使用者投票。民青局話，各慈善團體代表都表示會透過地區網絡鼓勵服務使用者投票，並有彈性安排方便員工投票。