【Emily】港團隊揚威德國口琴賽 奪18三甲獎

【明報專訊】啱啱喺德國舉行嘅第十屆世界口琴節2025（World Harmonica Festival 2025），香港代表再度揚威，香港口琴協會代表團合共參與14項賽事，喺10個項目奪得18個三甲獎項，其中英皇書院同學會小學嘅口琴隊成員分別喺6項比賽中奪得3冠2亞1季。

協會話今年組織咗超過150人嘅代表團參與世界口琴節，參與人數歷屆最多，喺當地時間10月30日起至11月1日，同全球數百名頂尖好手同場較量，香港參加者創出佳績。成人組別方面，梁芷喬成為香港首位獲得世界口琴節半音階口琴成人獨奏冠軍女口琴手。英皇書院同學會小學嘅口琴隊成員成績最好，奪3冠2亞1季，佢哋嘅成員喺其他國際性嘅口琴比賽中多次奪獎。

今屆活動除咗比賽，選手仲可以選擇參觀口琴維修工作坊、口琴工廠等；並參觀口琴知名品牌Hohner嘅口琴博物館，該館收藏有25,000種口琴與手風琴。世界口琴節最早源於1950年代，當時兩年辦一次，其後改為每四年一度，於德國特羅辛根舉行，賽事被譽為「口琴界奧林匹克」。