【Emily】員工換新制服 城巴：突顯專業形象

【明報專訊】城巴公布旗下員工包括車長等，今年內陸續會換上全新制服，話新制服設計充分考慮各前線職系嘅獨特需求，包括車長、督察及駕駛導師等；形容制服選用優質物料及精湛剪裁，大幅提升工作時舒適度，同事著起嚟更醒目，能突顯公共服務業界嘅專業形象。睇番件新車長制服，都係沿用直條紋恤衫設計，但剪裁更貼身，仲有新款嘅風褸及方便駕車嘅背心外套。

城巴管理層最近亦有改動，由前高官羅智光出任城巴主席，城巴話股東漢思集團以及新任領導團隊會推動公司持續發展。羅智光話，過去幾年集團引入全球首輛三軸雙層氫能巴士及全港首個加氫站，佢期待與團隊共同構建更卓越嘅管治文化。

城巴董事總經理鍾澤文亦表示，今年下半年會優化公司管理系統，並理順內外協作關係，會續聆聽同事意見，改善工作環境，話全新車務控制中心已投入使用，城巴食堂營運亦升級改善。