【Emily】東九文化中心啟用 開幕季推17節目

【明報專訊】位於牛頭角道60號嘅東九文化中心噚日正式啟用，並喺本月至明年2月推出17項「東九開幕季」節目。主禮嘉賓政務司長陳國基喺揭幕禮致辭話，中心係香港最新旗艦表演場地，唔止係推動文化藝術發展重要里程碑，更係鞏固香港作為中外文化藝術交流中心嘅關鍵一環。東九文化中心前身係牛頭角下邨第11至14座，陳國基話中心建築設計融入昔日牛頭角下邨嘅社區元素，做到新舊交融、傳承創新。

陳國基：文藝發展里程碑

陳國基又話，中心設5個分別可容納120至1200個座位嘅表演設施，配備先進舞台設備，並將劇院預留作長期演出，以支持業界創作更多優秀作品。佢提到舊年8月以來，場館舉辦20套共500場「東九開箱」試場節目活動，吸引超過1.3萬人次觀眾入場。

為期3個月嘅「東九開幕季」，開幕節目係11月15日起演出嘅原創粵語音樂劇《一束光——高錕的記憶》。劇目策略顧問周國豐認為，對比其他劇院，東九文化中心背景轉換速度好快，對藝術視覺呈現有幫助；身兼劇目聯合監製、導演及編劇嘅李敏補充話，中心沉浸式投射設備令畫面更具立體感，但佢覺得適應新場地高科技嘅設施有困難。

被問點解揀高錕嘅古仔，周國豐話係因為故事勵志，希望用藝術科技呈現形式，將人性化同科技結合，令觀眾除咗覺得好睇，亦會覺得窩心。佢話起碼會做15場，如演出成功，希望將項目發展到大灣區，同時吸引旅客來港觀賞。