【Emily】來自多地2.1萬人參賽 迪士尼10K跑新高

【明報專訊】跑步盛事香港迪士尼樂園度假區10K Weekend 2025噚日圓滿結束，今年嘅20周年派對版吸引來自香港、內地、台灣、日本、韓國同泰國等地逾2.1萬名跑手參加，創下歷史新高。

今年「迪士尼跑手造型獎」閃耀回歸，鼓勵跑手以最具創意嘅迪士尼造型盛裝登場，唔少跑手悉心打扮，為賽事增添歡樂氣氛。迪士尼並與綠惜地球合作，於賽道沿途提供飲水機，以及現場回收紙杯膠樽等，又回收蕉皮堆肥，實踐綠色理念。

財政司長陳茂波噚日主持起跑儀式時致辭，話「10K Weekend」係一場奇妙嘅慶祝活動，融合咗體育、旅遊與社區精神，今年活動別具意義，唔止為即將舉行嘅全運會熱身，亦係香港迪士尼樂園度假區慶祝20周年嘅一部分。佢又話呢一類盛事可展現香港作為既有活力又具多元內涵嘅旅遊目的地，深信香港能繼續受各地遊客歡迎。