【Emily】傳火炬採訪安檢嚴 人手查完警犬搜

【明報專訊】全運會首次喺香港舉行，不容有失，Emily噚日採訪全運會火炬收火儀式時已經感受到現場戒備森嚴，喺入口前有人手檢查，入到場出動警犬搜索傳媒看台，同時喺火炬手到場前已有幾名消防員攜帶滅火筒候命。

傳媒要朝早9點15分前到啟德體育園中央廣場集合，Emily約9點喺傳媒入口登記後就開始安檢，先由保安檢查隨身物品，再以金屬探測棒探測身上有無金屬，本以為入到場就完事，點知警方突然要求傳媒暫時離開傳媒看台，並要放低隨身物品喺看台上，隨後派出警犬上看台搜索。

可能因為喺室外採訪，記者今次可以帶有蓋水樽入場。Emily噚日帶咗個350毫升保溫樽，保安只係問「入面裝咩㗎」，Emily回答裝咗水，對方無要求打開蓋檢查，直接容許入場。