【Emily】教大西九教學中心揭幕 碩士生去戲曲中心上堂

【明報專訊】香港教育大學第三個市區教學點噚日喺西九文化區戲曲中心揭幕，佔地6300平方呎，主要係10個碩士課程同校董培訓課程嘅上課點，亦會用嚟舉行研討會、工作坊、公開講座及學生活動。教學中心仲特別喺接待處設「功課提交服務」，方便各位同學交功課。

今次係教大喺九龍嘅第一個教學中心，另外兩個分別喺北角同將軍澳。位於戲曲中心入面嘅西九龍教學中心，雖然面積無另外兩個教學中心咁大，但都有一個課室同多功能活動空間，亦有學習共享空間、討論室等，可以舉行唔同活動，位置上亦可方便在職嘅同學。

出席揭幕儀式嘅教大校董會主席黃友嘉話，期望西九龍教學中心能夠為藝術家、文化從業者、教育工作者同學生提供知識交流平台，同時加強年輕人嘅文化素養。