【Emily】教大心理急救先導課程 2400人完成培訓

【明報專訊】香港教育大學舊年7月起同香港紅十字會合作推出「心理急救」先導培訓計劃，教學生、教職員同校友有關基礎心理急救知識同心理支援技能，幫佢哋喺壓力同埋緊急情况下應對挑戰，至今約2400人完成培訓。

教大教職員陳小姐憶述，曾有朋友嘅親人發生意外入院，佢去到醫院面對情緒激動嘅朋友，就運用所學，包括觀察朋友嘅情緒反應、專注聆聽並接納對方感受，仲提供所需嘅醫療資訊，最終幫到朋友渡過困境，自己都好欣慰。

紅會有意擴至其他院校

有教大校友就話受課程啟發，報讀咗心理急救進階課程，希望加入紅十字會做義務心理急救員，支援更多有需要嘅人。

教大話先導計劃結束後，會繼續提供多元化、提升精神同心理健康嘅活動；香港紅十字會亦積極計劃將心理健康課程推廣至其他教育單位。