【Emily】總領事：萬聖節源於我哋愛爾蘭 話來自古凱爾特人夏末節 逾2000年歷史

【明報專訊】今晚係萬聖夜，喺扮鬼扮馬狂歡之餘，有無諗過呢個節日嘅起源呢？愛爾蘭駐港澳總領事白嬿（Jennifer Bourke）同Emily講，有別於好多人嘅認知，萬聖節其實唔係源自美國，而係源自愛爾蘭，仲慶祝咗超過2000年咁耐。

Jennifer話，古代凱爾特人最初喺收成季節完結同入冬時慶祝「夏末節」（Samhain，發音sow-win），佢哋相信呢個節日係靈界同塵世最接近嘅時刻，而逝者嘅靈魂會穿越到彼岸。為咗融入靈魂當中，古凱爾特人會戴上面具將自己扮埋一分子，又點起營火驅逐惡靈。

雕刻白蘿蔔變南瓜

為亡者祈禱換食物變討糖果

𠵱家過萬聖節會有人會喺南瓜上雕刻，Jennifer話愛爾蘭習俗一開始係喺白蘿蔔上雕刻人樣做護身符，另外「不給糖就搗蛋」（trick or treat）就嚟自民眾戴住面具逐家逐戶幫亡者祈禱換取食物。

隨住愛爾蘭人移民去唔同地方，萬聖節傳統帶到美國同世界各地，發展成今時今日嘅萬聖節。

Jennifer話，無論出去trick or treat定去蘭桂坊夜遊，希望大家今日都記得愛爾蘭係萬聖節嘅發源地。