【Emily】駁青年「躺平」論 麥美娟：潛台詞想批政府

【明報專訊】立法會社福界議員狄志遠日前喺《明報》撰文，提到現時年輕人有「躺平、放棄，或是遠走他鄉」現象，民政及青年事務局長麥美娟就反駁，話有人咁講，潛台詞係想話政府做得唔夠，所以青年「唔like你」、「講衰政府」，但佢認為呢種說法對青年唔公平。

狄志遠倡畀學生發聲

狄志遠日前撰文話，社會正將年輕人推向日益狹窄的單行道，「讀書必求名列前茅，就業必爭四大會計師行、律師或醫生」。而單一化發展模式就催生出大量「不快樂的年輕靈魂」，又話好多青年放棄對未來嘅憧憬，佢哋並非唔願努力，而係睇唔到努力與未來之間嘅連結。狄志遠提出意見，認為應給予青年真實嘅空間，唔好再收緊言論自由、限制文化創作、壓制學生組織，應該畀年輕人發聲、有嘗試嘅舞台、有犯錯並從中學習機會，話「如果一個社會連學生自治都無法包容，又如何培育出有擔當、有視野的下一代？」

麥美娟噚日喺商台節目《政好星期天》話，呢啲評論嘅潛台詞係想指摘政府做得唔夠，認為說法唔公平。佢提到民青局提供嘅專題交流計劃，每年申請人數倍增，反映青年積極參與；又話全港18區均設立青年委員會，每年有數千人自薦加入，競爭激烈，認為青年努力爭取每個機會，唔係「躺平」。