【Emily】憶伙黎棟國睇法案「窿罅」 江玉歡：官員都驚立法雙雄

【明報專訊】逾20個立法會議員已宣布唔競逐連任，其中新民黨黎棟國日前開記招宣布唔參選時，引述選委界別江玉歡（Doreen）喺專欄對法案委員會「邏輯上自洽，執行上可行」嘅期望。同樣唔爭連任嘅Doreen聞言，噚日就喺社交媒體回憶起同黎sir「以法案委員會為家」，自言兩人係「立法雙雄」，官員都驚咗佢哋；佢仲話知道黎sir唔參選，即刻諗不如同對方搞個節目導讀法案。

Doreen話兩人經常約好報名某個法案委員會，加入後互相「補飛」，你睇「窿窿」我睇「罅罅」，又重提自己喺立法會提問時問過「盲人揸車」之誤，話唔係「立法雙雄」之作，純屬自己口誤。Doreen又話，𠵱家同大家「無拘無束」分享天下事，公布唔選後連followers數量都多咗，覺得感恩。

葉劉自喻埃及女王

話永不言退

前日同樣宣布退下火線嘅新民黨主席葉劉淑儀，翌日就出席「未來科學大獎頒獎典禮」，並喺社交媒體發布同科大校董會主席沈向洋夫婦嘅合照。葉太喺Instagram另一個帖留言話自己「永不言敗，也永不言退，離開立法會後勢新的一頁的開始」。佢又話自己雖無古埃及法老王克利奧帕特拉（Cleopatra）嘅美貌，但同對方一樣，年齡不能令佢乾枯，更唔會影響佢嘅鬥心同靈魂。