【Emily】湯家驊：為換人而換係制度枷鎖 話特朗普拜登七旬先做總統

【明報專訊】唔少「登七」立法會議員近日先後放棄競逐連任，引起政界談論。行政會議成員湯家驊噚日喺社交媒體有感而發，話相信好嘅政治人物要有清晰思路、分辨到對錯嘅廣闊視野、堅持理想嘅決心，反問「這些素質是年輕人還是閱歷較多的人比較容易擁有？大家心裏有數」。佢又話求人才唔能夠只依賴數據，「有好素質的年輕素人，也有專橫跋扈的年長從政者」，覺得關鍵係人選，而非年齡。

湯家驊提到，多個年屆70議員宣稱退位讓賢，不過睇番美國政壇，美國前總統列根就職時就快70歲，而美國現任總統特朗普第一次上任時年屆70歲，下一任嘅拜登就職時年屆78歲，到特朗普再回朝時已經係美國最年長嘅繼任總統。佢又覺得好制度應該廣納賢才，一套「為換人而換人」嘅制度，只係刻板、唔符合理想效果嘅「制度枷鎖」。

與美國人諾獎得主傾談

葉太：港美維持人與人聯繫仍重要

另外，最近不斷被問參選意向、75歲嘅新民黨主席葉劉淑儀前日出席科大頒授榮譽博士學位典禮，並與同屬美國人嘅諾貝爾化學獎得主Roger Kornberg、黑石集團董事長蘇世民傾談。葉太喺社交媒體話，即使地緣政治局勢緊張，港美維持人與人之間聯繫仍然重要。