阮小儀離職商台 結束30年賓主關係 稱與健康無關 想多陪家人投入人生另一條航道

【明報專訊】54歲商台DJ阮小儀效力商台逾30年，剛於8月在商台台慶晚宴獲頒30年長期服務金牌，昨日她在節目《早霸王》宣布將離開商台，10月31日是她在商台903的last day。小儀表示裸辭未有新計劃，但強調並非退休，為免引起誤會，亦表明跟健康無關，只想有更多時間陪伴家人及享受人生。小儀跟森美多年拍檔，由電台到演舞台劇及擔任電視主持，小儀在「下把」位，有段時間粉絲也看不過眼，認為她被欺負。對於小儀離開商台，森美說：「知道消息時心諗，我輸咗！」粉絲對消息感震撼，有形容似一個時代的終結，也有留言：「森美小儀無咗小儀，森美點算？」

阮小儀在節目宣布離開商台，笑言拿了金牌才離開感覺完美，但不要誤會她退休，自己也想有新計劃。她稱向高層辭職時，說想闖吓亦想休息吓，說30年時間好長，要認老了，多年未試過完全停工去探討自己的人生，或有新嘗試。

森美：點解我會輸畀小儀

阮小儀於1994年10月17日入職商台，形容當年到商台投考是人生第一次勇敢，今次決定辭職是人生第二次勇敢。森美稱幾個月前小儀跟他提到這決定，當時第一個反應是擔心她的健康出問題。小儀自稱白白豬、肥嘟嘟、好健康。至於她裸辭後的生活，森美表示不會為對方擔心：「我絕對唔擔心小富婆嘅收入。我都有同佢講，我唔會挽留你，因為人有權決定自己嘅人生。」他又稱小儀曾跟他說：「唔係你走先、就係我走先㗎啦！」形容這句話重擊他心臟，「當時心諗，我輸咗𠻹！點解我會輸畀佢！」

小儀：嚟緊有好多嘢想做想試

節目後小儀在個人社交平台再交代，她寫道：「對唔住。喺商業電台工作已經30年，自己都無諗過可以咁長情……一段關係可以咁長久，必定係雙向嘅，你對我好，我亦好愛你。但對唔住，我想喺𠵱家行開一吓，大膽地畀自己放手，去投入人生另一條航道。離開的確需要勇氣，我都考慮咗好耐，所以你不用替我可惜，亦不用多疑覺得有乜嘢問題發生，只係我覺得現在剛剛好。各人都有自己人生嘅時間表，節奏亦都唔一樣。」她又說：「我今年好純粹地選擇，想喺11月自己生日月開始，好好地完結本身嘅崗位，然後誠實地、安然地去開始我另一段小路。嚟緊嘅呢場人生，我有好多嘢想做，有好多嘢想試，總之就係想喺呢段日子去見識吓，去感受吓、去學習吓、去嘆吓、去寵壞吓。我仍然會工作，因為仍然要食飯吖嘛，所以唔係乜嘢搵夠呀嗰啲。」

森美回覆傳媒有關小儀離開商台，讚小儀的勇氣值得學習，能在人生階段中主動追求想走的路，選擇新生活，值得恭喜，為她高興。很多粉絲感不捨？森美稱希望集結眾人祝福，助她早日「封盤」嫁人。

曾被商台重罰 停薪留職兩個月

森美與小儀多年合作無間，曾一起主持《森美變態樂園》、《森美小儀dot dot dot》、《架勢堂》等節目，兩人曾組「森美小儀歌劇團」走上舞台，又雙雙入屋做電視節目主持。2006年兩人主持《架勢堂》搞「我最想非禮的香港女藝人」網上投票，惹婦女團體投訴，兩人公開道歉並被商台重罰，停播《架勢堂》兩個月及停薪留職。

娛樂組