【Emily】工程擾東涌河生態 有蜻蜓魚類失蹤影

【明報專訊】東涌新市鎮擴展工程如火如荼，綠色力量噚日公布東涌河生態及水質調查結果，顯示整體蜻蜓同原生魚類物種數量均未回復至工程前水平，部分蜻蜓物種更「絕迹」，暫未見佢哋重返東涌河。

蜻蜓3年少咗6種

今年4至9月，綠色力量喺東涌河下游錄得27種蜻蜓，較去年28種略減。綠色力量環境事務經理盧詠鋒話，當地自從2022年中展開大型土地平整工程後，首年仍錄得33種蜻蜓，之後一直下跌，今年錄得品種較3年前跌咗18%，一啲常見品種如褐斑異痣蟌及錐腹蜻，喺工程開始後已消失。調查亦發現東涌河嘅原生魚類物種數量下跌，河口及下游分別錄得22種及11種，較工程前分別錄得最高33種及12種減少，當中河口跌幅達33%。

盧詠鋒分析，河道旁邊做土地平整工程，表土植被被移除，泥土容易被雨水冲落河道，改變河牀嘅微生境結構，原生魚類因而減少；低地農田及溪流生境消失亦影響蜻蜓存活。佢話政府重視保育東涌河，但東涌河生態日益受壓，當局緩解措施有需要升級，例如喺地盤邊界設置沉澱池，攔截污水及泥沙進入河道。