【Emily】長者憑券食平Tea 孫玉菡試雪菜肉絲

【明報專訊】飲食業及民間團體早前推出「愛心食肆 賞你惠食」活動，長者憑餐飲券去7個飲食集團，可以15元食到指定下午茶餐，勞福局長孫玉菡噚日就應飲食界議員張宇人安排，去參與計劃嘅銀龍茶餐廳，同幾個長者齊齊食雪菜肉絲米做下午茶，同時了解佢哋嘅生活同需要。

孫玉菡話，活動頭兩輪已經派出5萬套優惠券，今次第三輪增加到6萬套，畀更多長者受惠，每人可以拎到一套7張嘅優惠劵，喺今年10月1號至11月30號食平價下午茶餐。

優惠券透過長者中心向獨居、雙老或隱蔽長者派發，孫玉菡話，活動不單止為長者提供飲食優惠，仲可以喺派發過程，吸引未接觸過長者中心服務嘅老友記認識身邊嘅社區資源，同長者中心建立更緊密聯繫，令社會服務網絡更容易識別有需要人士支援。