【Emily】中秋金多寶頭獎1.5注中

【明報專訊】噚日係中秋佳節，大家都祈求人月兩團圓，但如果可以捧走8000萬元橫財就更加圓滿！頭獎基金估計高達8000萬元嘅六合彩中秋金多寶攪珠噚晚舉行，攪珠結果係「15、17、19、23、24、34」，特別號碼係「33」，頭獎有一注半中，若以10元一注計，每注派彩高達5464萬元；二獎有9注半中，每注派彩亦有77萬元。今期總投注額超過2億元。

今次係香港回歸以嚟，馬會第四次安排喺中秋正日舉行中秋金多寶攪珠。馬會之前話，中秋金多寶係歷史最悠久嘅金多寶，由1985年起已舉辦咗39次，馬會仲畀咗中秋金多寶旺門冧巴統計，話歷年開出最多嘅係「7」同「15」號，開出多達10次，「12」同「40」號亦攪出9次，「5」、「9」、「28」同「43」號則出現8次，結果當中「15」號喺噚晚嘅攪珠再次出現。