經濟
大灣區航空「超經艙」年底飛札幌
【明報專訊】大灣區航空2023年宣布訂購15架波音737-9客機今年陸續交貨，公司噚日仲公布今年12月起，往來日本札幌線首推「超經艙」（Premium Class）客位，提供較寬敞嘅搖籃式座椅，免費飛機餐，優先行李處理，優先Check-in、登機等，公司話將會喺新一代波音 737-9客機上提供「超經艙」客位。有關客位12月17日起會率先喺香港來往日本札幌嘅航線推出。
大灣區航空副主席兼行政總裁侯偉話，今年底前，集團會接收兩架波音737-9客機，未來幾年陸續接收其餘已訂購嘅新機，而隨着機隊不斷擴充，集團計劃將「超經艙」推展至更多其他航線。
根據公司描述，「超經艙」座位闊超過20吋，椅距達40吋，每座位均有獨立電源同埋USB接口。小琴睇灣區航空網頁介紹佢啲737-9客機時，就提到所有乘客都有免費高速Wi-Fi用，不過噚日公司未有提，遲啲會唔會有好消息？
