【Emily】港台×印尼國家電台 歌舞促進文化交流

【明報專訊】香港電台噚日喺鑽石山荷里活廣場舉行電台節目Halo Jakarta! Hello Hong Kong! 特備活動 「Home Sweet Home」，香港少女組合Honey Punch、居港印尼裔社群與學生出席活動，以歌舞、喜劇及時裝表演促進兩地文化交流。

適逢今年係中國同印尼建交75周年，活動特別以中秋佳節為主題，透過多元嘅文藝表演展現族裔間嘅文化共融，活動匯聚不同範疇嘅居港印尼社群參與演出，推動港印文化交流，包括印尼巴布亞嘅傳統舞蹈、印尼裔時裝設計師Andy Sugix帶來以印尼傳統衣料結合現代剪裁嘅時裝騷等。

廣播處長關婉儀話，港台同印尼國家廣播電台今年連續第二年將聯合製作嘅節目由直播室搬到社區，走進群眾，畀在港印尼人近距離感受家鄉文化，同時體會香港社會嘅溫情。噚日嘅活動片段稍後會剪輯成精華喺港台播放。