【Emily】呼籲防流感 官員針針針

【明報專訊】各項政府疫苗接種計劃星期四（25日）展開，特首李家超等一眾官員早前齊齊去打疫苗，並呼籲市民盡早接種，保護自己同家人。

除咗李家超，政務司長陳國基、財政司長陳茂波、保安局長鄧炳強、公務員事務局長楊何蓓茵、勞福局長孫玉菡等官員都有出席。李家超引述衛生署提醒市民，香港已經踏入夏季流感季節，接種疫苗係預防季節性流感最有效方法之一。

醫衛局話，上年度各項政府疫苗接種計劃為市民一共接種超過209萬劑季節性流感疫苗，比前一年度增加近12%，創歷史新高，亦因此上一季嘅成人同兒童流感嚴重個案及死亡率明顯下跌。醫衛局長盧寵茂提醒，接種季節性流感疫苗後，身體大約需要兩星期產生抗體，呼籲大家盡早接種。