【Emily】惡搞《頭文字D》籲滅蚊 清潔龍：三萬隻蚊過夜

【明報專訊】20年前上映嘅港產片《頭文字D》近日上映修復版，引起網民熱議，連食環署吉祥物「清潔龍阿德」噚日喺社交平台都用到電影經典對白二次創作，就好似「三萬（隻）蚊過夜」、「唔會輸畀同一個人，Twice（兩次）」等，上載題為「頑蚊治T」短片，呼籲公眾注意滅蚊。

短片全長43秒，開場由阿德拎住有積水嘅水桶講「三萬隻蚊過夜呀，你個桶係積水嚟㗎」，之後再將啲積水倒落地，呢一句就係電影中由杜汶澤飾演嘅阿木向周杰倫飾演嘅拓海講嘅對白。之後阿德扮陳小春飾演嘅京一，講「我阿德係唔會畀同一隻蚊針 Twice」，仲舉起兩隻手指，認真搞鬼。

最後短片女主角拎住有飲管嘅水壺話「我要滅晒啲蚊」，都係電影經典一幕，扮緊阿木同阿爸扭計話「我要買GTR」，阿德就安慰佢話「冇畀蚊針咪好囉，人無事，先做到世界冠軍㗎嘛！」