【Emily】酒店老樹吹塌 龍華喊心痛

【明報專訊】超強颱風「樺加沙」襲港，大量樹木同戶外設施受暴風蹂躪。其中喺戰前建成、超過80年歷史嘅沙田龍華酒店亦當災，龍華集團噚日喺社交媒體上載10號風球後情况，相片所見餐廳園林唔少大樹被吹冧，一地落葉枯枝，標誌性嘅紅燈籠隧道亦無法倖免，部分燈籠被吹跌，龍華集團大呼「心痛」。

餐廳枱櫈、雜物被吹到東歪西倒，大樹連根拔起，龍華集團話餐廳係香港地標，承載好多人嘅集體回憶同情感，睇到呢處遭颱風重創，尤其百年大樹被連根拔起，令人惋惜同難過。集團話呢啲大樹見證咗時代變遷，亦係社區一部分，佢哋遭受損傷「不僅是自然景觀的破壞，更是情感上的打擊」，希望災後重建後盡可能恢復酒店風貌。

10號波期間，唔少大廈嘅構築物被吹到搖搖欲墜甚至飛脫，其中有大廈嘅外牆煤氣喉管被擊中，造成氣體泄漏。消防處高空拯救專隊到場後，利用進階繩索技術固定被吹倒嘅大型物件，煤氣公司就派人處理泄漏，解決事件。