【Emily】十一推兩日任搭八達通 售198蚊 限期過後可內地澳門使用

【明報專訊】下星期就係內地十一黃金周長假期，八達通公司推出全港首張「隨意乘」超級通行證，每張198元，旅客喺指定兩日內可乘搭港鐵、九巴、龍運巴士、城巴、天星小輪、新渡輪指定路線；限期過後可當一般成人八達通增值使用，並有港元自動兌人民幣功能，之後可用於內地及澳門有「交通聯合」標誌嘅公共交通工具。

唔包機場快線東鐵頭等

「隨意乘」喺10月1日至3日早上9點至下晝2點，喺羅湖站、落馬洲站及柯士甸站發售，每日限售1000張，兩日期限由購買當日即日生效，舉例10月1日購買，免費期為當日午夜12點起至翌日晚上11點59分。免費乘車優惠有條件限制，坐港鐵就唔包括機場快線、東鐵線頭等車廂；九巴及龍運巴士每日限搭10程，另每日最多可搭兩次B1路線，機場巴士就不包括在內；城巴觀光路線、機場及大嶼山服務路線都唔涵蓋。

隨卡亦附送港鐵商場電子優惠券，用家要先下載及登記為MTR Mobile會員再掃二維碼領取，喺指定商場及商店以八達通消費滿500元，可以減100元；指定商場食肆就消費滿300元減50元。