【Emily】答問會出實時字幕 立會謄錄AI見真章

【明報專訊】立法會已應用智慧謄錄系統「智識聽」，喺會議期間提供實時字幕，而特首李家超噚日去立法會出席答問會時都有用到，立法會主席梁君彥話系統使出咗「真功夫」，一鼓作氣提供實時字幕之餘，整理答問會文字紀錄更加無難度，話新系統大大壓縮工作時間，答問會朝早10點半開始，第一部分嘅逐字紀錄喺朝早11點半前已發布，而第二部分喺下午12點幾亦已「出街」，完整版嘅逐字紀錄喺答問會結束後約一個鐘已全部上載。

「智識聽」應用AI技術，聽到發言後會謄錄文字，但始終唔會百分百準確，大家見到文字出街，背後都係要人手即時修正，所以答問大會期間，有賴秘書處職員喺幕後同時間競賽，即時把關修改字眼，梁君彥形容透過「人機結合」先確保精準紀錄特首同議員嘅一言一句。

第七屆立法會任期仲有一個多月就結束，梁君彥話議員及官員同心同德，會繼續支持特首同特區政府依法施政。