【Emily】被鐵通插車長出院 城巴讚臨危不亂

【明報專訊】日前揸緊巴士時畀鐵通擊傷嘅羅姓城巴車長噚日出院，城巴facebook發布佢嘅錄音「報平安」。羅車長話身體已經冇乜大礙，淨係唔可以行得太快，仲話希望快啲出嚟見番每日搭佢車嘅朋友咁話。

今個星期一下晝5點幾，65歲嘅羅車長喺青朗公路駕駛967號線巴士去緊元朗方向，突然有一條長173厘米嘅鐵通飛埋嚟，插穿巴士擋風玻璃，擊中羅車長胸口，好彩只係擦損，佢清醒由救護車送去屯門醫院治理。

當時巴士有好多乘客，有人事發後話羅車長忍痛無急煞車，而係慢慢將巴士停低，無釀成大意外。城巴亦話羅車長喺危急關頭展現敬業精神，將巴士安全停車，確保所有乘客安全，公司深表敬佩。羅車長噚日喺錄音裏面亦多謝太太同城巴同事，仲話：「好多謝大眾市民對我嘅關心，我都無咩事，你哋放心啦！」