【Emily】帶路嘉賓食清真粵菜 「旅途更開心」

【明報專訊】第10屆「一帶一路高峰論壇」一連兩日（10至11號）喺香港舉行，當中有唔少穆斯林嘉賓。旅發局把握機會，向佢哋推廣香港嘅穆斯林友善旅遊配套，帶佢哋食有清真認證嘅中菜。

旅發局上周四（11號）晚邀請論壇部分穆斯林嘉賓，到本地首間有清真友善認證嘅中菜館「唐述」食粵式清真菜，旅發局代表向佢哋介紹本地穆斯林旅遊最新發展，同會展旅遊嘅宣傳工作。

已經訪港多次嘅馬來西亞鐵路工業公司總裁Mohd Yusoff Sulaiman第一次食有清真認證嘅粵菜，大讚好食，又話朋友向佢推薦本地有清真認證嘅餐廳同咖喱菜式，希望可以一試，又話想參觀博物館，了解香港歷史。第二次來港嘅大馬聯邦農業銷售局主席Aminuddin Bin Zulkipli話，出行嘅首要目的係食嘢，如果可以喺目的地食到唔同嘅清真菜，會令旅途更開心。

除咗食清真菜，旅發局仲帶咗佢哋去睇賽馬、搭船睇維港景色，亦有嘉賓喺論壇完咗之後留港搭纜車上山頂，同參觀博物館。