Emily Online︳彩明街市小食街推「熱氣球苦主」優惠　消費後憑活動門票可獲雪糕 (18:35)

本港首個熱氣球節「友邦香港國際熱氣球節」活動安排連日惹來大批消費者抨擊，主辦方最終全額退款。啱啱完成重新裝修嘅彩明街市就話要「慰藉一眾苦主嘅心靈」，推出「熱氣球苦主」優惠，即日起至9月14日，憑熱氣球節門票喺街市小食街消費，就可以免費獲贈雪糕或雪條；喺部分商戶購買指定產品亦享優惠。

為期3日嘅活動由每日10點開始，雪糕或雪條限量供應。所有經官方渠道購買活動門票嘅人士都符合活動資格，每人每日只限換一次。至於參與優惠嘅商店同產品，就包括雞蛋仔、桃膠芋圓鮮奶、水果茶、越式小食等。

其中一名「苦主」何小姐因為接受訪問嘅片段紅遍網絡，佢獲邀到彩明街市「探路」。何小姐話，自己嘅有翻天覆地嘅變化，有街坊認出佢之餘仲想合照。講到成功獲退款，何小姐覺得開心，但最感動係獲得好多港人支持，話事件係對小朋友嘅正面教材，「就算面對不公的事情也要勇敢發聲！」