【Emily】迪士尼20周年慶典 Marvel同Pixar項目概念圖曝光

【明報專訊】香港迪士尼樂園度假區噚日舉行20周年紀念慶典，仲公布Marvel同Pixar兩個擴建項目嘅概念圖。

迪士尼樂園年初提及今年內會開工擴建。迪士尼體驗主席戴明哲、迪士尼樂園國際總裁及董事總經理艾書琳同團隊噚日就到擴建工地了解工程進展。香港迪士尼形容Pixar主題娛樂體驗將帶嚟「沉浸式劇場歷險之旅」，透過尖端劇場科技，融合現實與虛擬環境，賓客可以同最鍾意嘅Pixar角色展開「歡樂同溫馨嘅互動體驗」，概念圖就見到《怪獸公司》嘅主要角色。

至於座落喺迪士尼樂園明日世界嘅Marvel主題體驗，亦會增設香港獨有嘅沉浸式遊樂設施，並加上娛樂及購物體驗，概念來自鐵甲奇俠（Ironman）對未來嘅願景。

曾賀10周年 羅淑佩舊地重遊

戴明哲話香港迪士尼過去20年成為帶領旅遊業發展嘅主要動力，未來會持續擴展，「讓更多深受喜愛的迪士尼故事呈現賓客眼前」。10年前以旅遊事務副專員身分出席樂園10周年活動嘅文體旅局長羅淑佩，噚日都有重遊舊地，話參與20周年慶典嘅演藝人員更多，又恭賀樂園舊年入場人數創歷史新高。