【Emily】民記：路面陷阱年招30宗受傷索償 調查十幾日搵到500處 倡定期推全民監察

【明報專訊】民建聯上個月喺各區做「全港破損路面大搜查」，噚日公布首階段「路面陷阱」數據及建議。民建聯發現，喺上月19號至今個月3號蒐集超過500個路面有損毁嘅地點中，48%係行車路，52%係行人路，主要問題包括行人路地磚及瀝青面破損、行車路凹陷、沙井蓋邊破損等。

民建聯副主席陳學鋒引述政府文件話，路政署每年平均接到約30宗市民因路面破損導致受傷索償嘅個案；中西區區議員楊開永就話，今個月3號有一個街坊因路經破損路面，腳部受傷要入院縫針治療。

倡全面用激光掃描評估

民建聯建議路政署盡快全面使用激光掃描路面三維影像嘅路面狀况評估系統，同埋喺維修、重鋪車流較高嘅破損路面時，積極考慮改動渠蓋或沙井蓋位置，又呼籲定期推行全民監察路面「黑點」。

民建聯中西區支部主席兼區議員楊學明就建議，署方應該喺人車流量較高嘅路面，選用較耐用、耐高溫，同埋透水性高嘅瀝清物料，並喺打風及暴雨後訂定巡查機制，檢測各區路面損毁情况，盡量一日內完成維修。