【Emily】馬料水新渡輪碼頭啟用

【明報專訊】香港唔少街渡碼頭有幾十年歷史，政府2017年推出「改善碼頭計劃」，重建或增建公共碼頭，而喺沙田科學園路馬料水三號梯台旁邊嘅「馬料水新渡輪碼頭」噚日啟用，兩條本身用梯台上落客嘅街渡航線，即係馬料水-荔枝窩、馬料水-吉澳／鴨洲周六（13日）起改用新碼頭，而馬料水-塔門、馬料水-東平洲兩條航線就繼續用附近嘅舊碼頭。

發展局話新碼頭有兩個泊位，採用浮動平台同斜台設計，平台會隨海面升降，同船保持同一水平，方便泊船同乘客上落船。另外岸上亦有充電設施、Wi-Fi熱點同電子顯示屏等。

改善碼頭計劃涵蓋23個公眾碼頭，當中7個包括大埔區荔枝莊碼頭、西貢糧船灣碼頭等今年底前會陸續啟用，至於南丫島榕樹灣公眾碼頭、長洲西灣碼頭同大澳公眾碼頭改善工程就預計明年完成。