【Emily】慶少年領袖團30周年 黃偉綸變身義勇軍

【明報專訊】副財政司長黃偉綸（Michael）官仔骨骨，原來佢後生時行過4次毅行者，亦參與過制服團體。

話說前稱「義勇軍」嘅香港少年領袖團今年慶祝30周年，日前喺一間酒店舉行晚宴，由Michael做主禮嘉賓，佢仲打番義勇軍嘅領呔出席。據知佢加入政府做AO（政務官）後加入義勇軍，1995年做到一個中隊嘅上尉（captain）。

佢喺晚宴致辭時話軍旅生涯獲益良多，30年間有昔日同胞繼續服務社會，自己就喺30年間轉職10幾個部門。

少年領袖團當晚嘅正式晚宴相當隆重，有唔同制服團體嘅代表著晒禮服出席，亦有個環節係奏出唔同制服團體嘅會歌，奏到所屬團體，該團體嘅成員就會企起身。Emily聽聞，黃偉綸喺奏出航海學校嘅《人民海軍向前進》時有企起身，可能因為佢做過海事處長。同場仲有做咗女童軍總會總監嘅海關前關長何珮珊。