【Emily】傳任政制局常秘 灣區專員票站開工

【明報專訊】政制及內地事務局常任秘書長懸空約一個月，官場傳聞有可能接任嘅粵港澳大灣區發展專員陳潔玲，早前接連現身選舉委員會界別分組補選多個環節，包括周日喺灣仔會展嘅中央點票站工作（圖），而今次補選不設內地或邊境票站。翻查資料，選管會主席陸啟康喺上月26日及本月7日先後主持危機管理委員會兩次會議，除咗政制局長曾國衞，陳潔玲兩次都有出席，仲坐喺局長旁邊。

根據周日票站所見，陳潔玲戴嘅名牌顯示係大灣區發展專員。政制局回覆Emily話：「選舉事務是政制及內地事務局負責的一個重要政策工作範疇，因此本局同事均積極參與選舉有關的工作，包括是次的選委會界別分組補選。」陳潔玲1994年加入政務職系，2018年做政制局副秘書長，任內負責2021年改制後嘅立法會換屆選舉；2023年轉任現職。大灣區發展專員本身係首長級薪級第6點（D6），常秘就係第8級（D8）。