【Emily】哪吒坐鎮 國慶3萬煙花耀維港 中總：呈東方文化國家科技

【明報專訊】今年國慶繼續有煙花大匯演，10月1日當晚8點喺維港上空上演，主題係「維港煙花 閃耀中華」，歷時23分鐘，合共發放超過3萬枚煙花，分為8幕，每一幕都有特色命名，例如以中國動畫《哪吒》為主題嘅「中華哪吒好故事」。香港中華總商會會長蔡冠深話呢一幕將呈現東方文化魅力同國家科技軟實力。

今年匯演由中總獨家贊助，總贊助額1800萬元。匯演先以「煙花綻放賀國慶」揭開序幕，之後就有「東江之水越山來」、「二十神舟航天夢」同「中華哪吒好故事」，緊接就有「總是熊貓最可愛」，到時會出現大熊貓圖案，背景音樂就有歌手陳卓賢同姜濤合唱嘅《抱抱大熊貓》；再嚟就係「五星閃耀全運會」同「一脈相承家國情」，最後以「奮勇向前復興路」閉幕。

易受天氣影響 取消無人機暖場

舊年匯演有無人機表演暖場，今年就無喇。負責煙花製作嘅港星多媒體製作行政總裁毛偉誠話，無人機易受天氣影響，所以今年會喺低空發放「125」字樣嘅煙花圖案暖場，慶祝中總成立125周年。

蔡冠深就希望當日有超過40萬人睇煙花，估計維港兩岸嘅酒店同餐廳都難訂位，呼籲商戶唔好加咁多價，「（內地遊客）嚟到香港乜都貴，嚇親人就唔好啦」。