經濟
小米運YU7到港 畀分析師傳媒「齋坐」
【明報專訊】內地手機大廠小米（1810）近年開拓汽車新業務，兼且喺今年6月推出第二款作品，即首部SUV小米YU7，內地賣25.35萬人民幣起跳。小米噚日就將YU7「頂配」版，即係Max版，帶嚟香港萬豪酒店展示畀香港人睇睇。今次展出嘅車款顏色係寶石綠（見圖），小琴聽聞呢個顏色廣受內地女車主歡迎。
展覽本身搞足兩日，開放畀分析師同傳媒體驗。不過呢架車係內地左軚版，喺本港「坐得唔揸得」，但都仍有好多分析師同記者嚟體驗架車嘅座椅按摩、天際屏全景顯示、車外語音控制等特色功能。
值得留意係，小米總裁盧偉冰上個月業績會時曾話過，小米汽車有信心完成全年35萬輛車嘅交付目標，仲預期汽車業務下半年有機會開始賺錢，以及業務2027年「出海」嘅目標無變。
至於小米汽車出海去邊？有指首站係歐洲。今年4月已有指小米汽車喺德國慕尼黑開設汽車研發中心，人手唔夠50個，會負責SU7 Ultra紐北限量版嘅研發同之後其他車型嘅性能調校。
