【Emily】林超英認叻：係我發明紅黑雨 內地歐盟都借鏡 讚香港防災「世一」

【明報專訊】極端天氣愈嚟愈常見，香港早排就落起連場暴雨，破一年內最多「黑雨」紀錄。天文台前台長林超英接受一間深度遊公司訪問，話住喺香港好好彩，「同樣規模嘅降雨，好多地方都頂唔順」。佢仲好自豪咁提到，香港𠵱家以顏色分級嘅暴雨警告系統係由佢「發明」，仲有其他地方參考借鏡𠻹！

話住香港好彩 同樣降雨多地頂唔順

林超英喺訪問中話：「我吹下牛，係我發明紅黑雨，即係用顏色講雨。到後來內地學咗、歐盟都學咗。我哋香港淨係諗到紅黑黃制度，已經係世界第一。」現時中國氣象局用藍、黃、橙、紅將暴雨預警分級；歐盟亦都有顏色分級描述唔同程度嘅天氣。

Emily睇番資料，香港天文台嘅暴雨警告信號喺1992年設立，當年5月8號早上一個鐘錄得接近110毫米雨量，創下當時最高每小時雨量紀錄，多處水浸、山泥傾瀉，更有市民喪生。之後香港就設立咗綠、黃、紅、黑雨分級，去到1998改為黃、紅、黑雨，用到𠵱家。

時至今日，林超英認為香港嘅防災備災已做得好唔錯，舉例2018年超強颱風「山竹」襲港，「好大風，零死亡，其實係不可思議」，認為香港防災備災「真係世界第一，我完全唔怕講世界第一嘅，我唔會有保留」。