【Emily】叮叮變身餐廳 $198歎萬麗High Tea

【明報專訊】平時主要載遊客觀光嘅「電車全景遊」，下月15日至9月14日會變成「叮叮餐廳」，乘客可以喺車上邊欣賞黃昏景色、邊食酒店級High Tea。今次香港電車同萬麗海景酒店合作，乘客喺電車上有一個鐘時間享受酒店喺9月中開幕嘅「Food Studio」自助餐餐廳嘅美食，例如鵝肝慕斯泡芙、圓鰭魚魚子醬魔鬼蛋等，每日5點半開車，由銅鑼灣站去到上環西港城，每位198元。唔單止有得食，乘客仲可以喺呢部仿1920年代設計嘅復古電車上，製作明信片免費寄去世界各地，同埋欣賞電車珍品同香港景貌嘅古今照。