BIG FOUR紅館騷秘密練兵 梁漢文笑張衛健跳「椅子舞」似沙甸魚

【明報專訊】張衛健、許志安、蘇永康與梁漢文組成的BIG FOUR下月9至11日假紅館舉行3場《BIG FOUR HAPPY TO SEE YOU ALL演唱會2025》，4子正積極排練，張衛健曾稱學林峯跳「椅子舞」，梁漢文笑言：「一定唔可以忘記有人要練蜈蚣彈同『林峯櫈』。」被問練習進度，張衛健說：「使唔使用2000幾呎排舞室嚟練？畀個廁所我練吓就得啦！」梁漢文稱對張衛健有期望，「你要做30幾吓，成條沙甸魚咁，幅度動作大過林峯好多」。許志安大爆張衛健已訂了櫈，張衛健不否認，但表演什麼大賣關子，「係訂咗張櫈，但唔係姓林，係姓張！今次擔保鍾意BIG FOUR的朋友，即使以前睇過我哋表演，都一定未見過我哋咁做，亦唔會諗到我哋會咁樣做」。

蘇永康透露今次BIG FOUR會一齊有樂器演出，花不少時間排練，張衛健付出好大努力，好期待這部分。張衛健笑言：「係，光宗耀祖就靠呢一part！」問到4子會否在台上騷肌？許志安表示不一定性感，但造型特別。張衛健提議許志安穿旗袍唱《喜歡你是你》，梁漢文即搭嘴：「開衩高到上腰。」

娛樂組