【Emily】財爺赴酒會 領事多謝官員訪法 話法國酒係「美麗香港故事一部分」

【明報專訊】近年香港同法國關係日益緊密，法國駐港澳總領事杜麗緹（Christile）噚晚喺法國國慶日酒會提到，多名司局長都有訪法，例如商經局長丘應樺同文體旅局長羅淑佩先後到訪法國酒莊促進貿易，仲話法國酒係「美麗香港故事嘅一部分」。Christile又話，歡迎舊年降低烈酒稅率，笑言希望可完全取消。

Christile又感謝律政司長林定國訪問法國，話有開放渠道討論所有議題好重要，期待將來兩地更多互訪。

陳茂波：香港到處可見「法式優雅」

代表政府出席酒會嘅財政司長陳茂波話，香港同法國兩地喺科技、房屋、教育、文化都可以加強合作，並再次邀請歐冠盃得主巴黎聖日耳門同法國國家隊嚟啟德。

陳茂波話，法國除咗係香港喺歐洲中最重要嘅貿易伙伴之一，香港都好鍾意法國產品，到處可見「法式優雅」，尤其係城中手袋或時裝品。財爺話，近年法國公司同專業人士對香港愈來愈有興趣，喺香港國際初創企業中，法國初創企業家數目更佔頭三位，反映兩地科技合作潛力。

酒會出席者還包括前特首林鄭月娥、羅淑佩、立法會主席梁君彥、行會召集人葉劉淑儀、行會成員林健鋒同多名議員。