【Emily】一家三代五人投身煤氣 見證行業變

【明報專訊】現今世代「子承父業」唔多，但張氏三代5個男丁都加入煤氣公司，由父子、兄弟「升呢」為同事。1970年代，張佛金加入煤氣公司馬頭角廠房做技術助理，喺佢鼓勵下，兩個仔張堅強、張堅文喺1980年代加入煤氣，由配氣操作部技術助理做起，分別升上技工同網絡技術專員。

後來張堅文成家立室，生咗兩兄弟張杜萍、張禪。兩兄弟做過飲食業，但工時長，日夜顛倒，為咗更穩定嘅工作環境，2017年一齊報讀煤氣公司氣體網絡見習技術員計劃，畢業後更被派去爸爸同伯父所屬嘅配氣操作部，成為第三代傳人。

張杜萍間中同爸爸同組工作，張堅文話有時忙起上嚟唔記得個仔叫咩名，「只叫佢『喂』！」張杜萍就話嗌咩都冇所謂，盡快完成任務要緊。佢哋亦盡量等對方返工放工，而細佬張禪雖然工作區域唔同，但工時更穩定，返多咗屋企食飯，三父子傾多咗偈。

三代人親歷能源行業轉型，張堅文話以前裝備簡單啲，比較着重手藝，𠵱家技術先進咗，反而要請教兩個仔AI等新科技。至於工作態度，父輩張堅強、張堅文凡事以工作為先，有一份使命感；新一代就覺得工作要全力以赴，但都要平衡生活。