【Emily】盧寵茂：人血產能有剩 捐血益身心

【明報專訊】立法會噚日舉行捐血日，香港紅十字會輸血服務中心派出流動捐血隊，去到立法會綜合大樓提供捐血服務，醫衛局長盧寵茂同唔少議員都有參與。局長話，從醫學角度而言，人嘅血液可以講係「產能有剩」，而捐血可以增強新陳代謝同免疫力，可以話係「無蝕底、有着數」。

多謝奉獻 話議員會「瞓得好啲」

參與捐血日嘅包括陳凱欣、邱達根、陳永光等議員，立法會主席梁君彥都有出席。盧寵茂話多謝議員以身作則，相信佢哋嘅行動可鼓勵香港市民參與捐血。佢又話，血液中嘅紅血球喺身體可以話係「過客」，大概發揮功能約120日就會被回收，加上身體造血能力好強，骨髓造血功能喺捐血後兩至三個星期就可將血造番嚟，所以捐血並無蝕底。

盧寵茂仲提到，捐血可以刺激新陳代謝，增加血液循環，某程度上亦會增強免疫力，更對捐血者嘅心理精神健康有幫助，帶嚟強烈滿足感同幸福感，相信議員捐血後「夜晚瞓覺都會瞓得好啲，或者開心到瞓着都會笑醒」。