【Emily】擴建重開後 藝術館人次破500萬

【明報專訊】康文署轄下嘅香港藝術館喺2019年完成擴建，噚日迎來重開後第500萬名參觀者，佢係來自加拿大嘅大學生Anabelle Champagne，館方就送咗以館藏設計嘅瓷碟畀佢做紀念品，再由總館長莫家詠向佢同朋友介紹展覽。

去年圖書館人流增逾一成

根據康文署資料，香港藝術館舊年有超過176萬人次參觀，較前一年增加四成，本地、內地同海外參觀者各佔三分之一，超過六成參觀者係30歲以下嘅年輕人；參觀超過一次嘅人都佔咗三分之一。

另外，立法會金融界議員陳振英關注康文署轄下公共圖書館嘅借閱量、人流等，康文署書面回覆話，舊年有2383萬人次到訪圖書館，較前一年增加逾一成，實體書嘅借閱量由2875萬項增至2897萬項，比前一年微增不足1%，電子書嘅借閱量就下跌近一成。