【Emily】兒童醫院派對賀芷希換心兩年 「心跳」贈局長

【明報專訊】危重病人獲得器官移植得來不易，小芷希前年獲得內地心臟移植，成為首宗內地器官跨境來港移植個案。芷希換心將近兩年，香港兒童醫院為佢辦派對慶祝，換心時只有4個月大嘅芷希大個咗好多，識得同醫衛局長盧寵茂玩玩具、拍手掌，芷希父母並向局長分享咗囡囡返學同生活片段。

醫衛局噚日喺facebook發帖，見到芷希著住聖誕老人圖案冷衫、夾住聖誕髮夾同盧寵茂玩，又面貼面影相。帖文話盧寵茂好高興見到芷希健康成長，可以同其他小朋友一樣咁精靈活潑，又話芷希父母錄低咗阿女心跳聲作為禮物送畀盧寵茂，芷希都喺份禮物拍上手印。

醫衛局話，兩年前內地同香港多個部門、醫護合作，讓芷希接受來自內地捐贈者嘅心臟，拯救咗佢嘅生命，令芷希一家得以齊齊整整。醫衛局話兒童醫院醫護團隊見到芷希表情多多、活潑可愛都非常高興，爭相同芷希合照，又話能夠見證曾經病危嘅患者重獲新生、生活如常，係醫護最大滿足。