【Emily】第17屆外交杯啟動 副特派員：了解國情重要平台

【明報專訊】第十七屆香港杯外交知識競賽即將舉行，大會噚日喺外交部駐港公署舉行啟動儀式。唔少學校都會派學生參賽，公署副特派員李永勝話，呢項競賽已成為重要嘅公共外交品牌活動，係香港青少年了解國家外交和國情知識嘅重要平台。李永勝又提及，明年係聯合國成立80周年，亦係萬隆會議召開70周年，話呢兩件大事喺外交史上有重要意義。

新一屆比賽以「感知外交 融通世界」為主題，話想鼓勵青少年進一步了解中國特色外交，深入思考青少年點樣可為國家外交做出更多貢獻。大會話比賽會結合中小學實際情况，做好試題設計，會創新賽制形式，要豐富獎勵內容。李永勝話歡迎學界持續關注同積極報名參賽。

大會又話，今年7月底第十六屆競賽嘅10間優勝學校師生代表去咗訪問北京和甘肅，親身感知中國嘅外交風采，而香港電台參訪活動，拍攝成三集電視節目，會喺本周四開始一連三個星期晚上8點於31台播出。