【Emily】港青聯換屆目標「擁抱世界」 擬明年率團哈薩克招商

【明報專訊】政商界年輕一族組成嘅香港青年聯會早前完成換屆，新任主席由林顥伊（前名林愛兒）出任。青聯成員噚日向傳媒介紹新一屆會董會嘅工作重點，林顥伊話今屆工作目標係「擁抱世界（embrace the world）」，即活動不限於香港及內地，計劃嘅項目包括明年率團去中亞國家哈薩克搞聯繫及招商，話青聯都要響應特首李家超所講，香港要做超級聯繫人。

青聯每年都會安排大學生到內地企業或機構實習，工作地點包括北京故宮等，但今年暑假實習計劃已衝出國外，有學生去咗迪拜嘅國企做實習生。

林顥伊又預告，青聯12月會舉行大型活動，計劃12月2日辦一帶一路青年發展高峰論壇，並會成立一帶一路青年網，至今接觸過150名來自一帶一路國家嘅大學生，會為佢哋提供支援及資訊，幫佢哋學成後可以留港發展。