【Emily】灣仔扒房Nebraska結業 熟客送別

【明報專訊】開業8年、前身為樂意扒房嘅「Nebraska Member of Louis Steak House」噚晚正式結業，唔少熟客把握最後機會品嘗餐廳馳名嘅斧頭扒，Nebraska亦準備咗印有餐廳名同招牌嘅杯，答謝顧客多年支持。

Nebraska早於8月初喺facebook宣布將於11月10日結業，話「擁抱再見，再次多謝大家支持」、「有緣再聚」，並提到部分餐具及用品帶唔走，將於今日至後日（11至13日），中午12點至夜晚7點開放參觀，並可免費自取或以較優惠方式選購餐具或家具。當日已有網民留言表示有意購買餐具，亦有不少網民感到不捨。餐廳老闆就同傳媒話，新冠疫情後大家消費習慣改變，餐廳蝕錢經營。

Nebraska嘅前身係有名人扒房之稱嘅樂意扒房，樂意喺2016年因敵唔過業主加租而結業。同年，樂意其中一名老闆楊大龍同兩個仔喺灣仔莊士敦道再起爐灶，除咗提供選自美國著名牛肉產地Nebraska嘅牛扒，仲有花膠扒等樂意經典菜式。睇番Nebraska嘅facebook，兩名金像獎影帝黃秋生同劉青雲都幫襯過。