【Emily】家福會一連兩周日鬧市派雪糕

【明報專訊】香港家庭福利會為慶祝成立75周年，今個月一連兩個星期日（16同23日）分別喺銅鑼灣軒尼詩道花旗銀行對開，同旺角永隆銀行中心對開，下晝1點至5點免費派雪糕，市民到時只需完成簡單步驟，就可以拎到雪糕。

家福會今年以「愛在．家在」為概念設計「幸福雪糕車」，令公眾喺炎炎夏日透過品嘗涼透心嘅雪糕，同家人分享「甜」蜜時光。

家福會話，一直秉持「以家為本」信念，希望透過今次活動，提升大眾對家庭幸福同家庭價值嘅重視；又提醒6月16日係父親節，期望當日可以為公眾締造優質家庭時光同珍貴難忘嘅時刻。