【Emily】伙海關繁殖8犬 兩獲選加入消防

【明報專訊】消防處噚日喺facebook話，同海關合作繁殖嘅兩隻史賓格幼犬已返到消防處。舊年11月出世嘅8隻狗仔，其中Neo同Stanley因為較適合消防工種，被挑選加入消防處，等佢哋長大多少少，就會安排到消防及救護訓練學院入班受訓。

處方同Emily講，挑選搜救犬時有多項考慮因素，包括狗仔係咪健康、唔怕同其他狗相處，同埋係咪可以快速適應新環境等。處方人員又會喺群體遊戲中，測試同觀察狗仔嘅各種動力、適應力同膽量，又透過隧道、梯級高台、平衡板等測試佢哋嘅能力。

根據立法會文件，舊年消防處有9隻工作犬，其中搜救犬採取5天工作制，亦有休班輪流待命嘅機制，職務主要係因應搜救失蹤或被困者行動需要，到山嶺或坍塌事故現場協助救援行動。